Tiranë-Durrës, treni merr para makinën, dy gra të lënduara
Një tren pasagjerësh përplasi një makinë që po tentonte të kalonte shinat, pranë fshatit Domje të Tiranës.
Nga informacionet e policisë që shkoi në vendngjarje, mësohet se nga përplasja kanë mbetur të lënduara dy gra, që ndodheshin në bordin e automjetit.
Automjeti, sipas burimeve policore, është i tipit “Benz Mercedes”. Ndërkohë, dy gratë e lënduara janë dërguar në spital, por nuk janë në rrezik për jetën.
Vitet e fundit kanë munguar sinjalistika apo rojet për hekurudhat, në vende ku shinat kryqësohen me rrugën e makinave, çka ka shtuar aksidentet.