Tmerruan shoferët në Vlorë, arrestohen dy të rinjtë

Policia e Vlorës ka bërë me dije se gjatë ditës së sotme janë arrestuar dy persona.

Dy shtetasit dyshoheshin se vidhnin pasqyra automjetesh, dhe kjo ishte një vepër e përsëritur nga ata.

Policia Vlorë/ Finalizohet operacioni i koduar ‘Mirror’

Policia ka arrestuar 2 shtetas, pasi dyshohet se vidhnin pasqyrat e automjeteve në qytet.

Specialistët për hetimin e krimeve, në bazë të informacioneve të marra në rrugë operative për vjedhjen e pasqyrave të mjeteve të markës ‘Mercedes’, menjëherë kanë organizuar punën me qëllim identifikimin dhe kapjen e autorëve.

Në kuadër të këtij operacioni, u bë kapja dhe ndalimi i shtetasve D. S., dhe R. H., (24 dhe 38 vjeç) me banim në Vlorë, të cilët dyshohen se ditën e djeshme në lagjen ‘Pavarësia’, Vlorë kanë vjedhur pasqyrat e një automjeti Mercedes, në pronësi të shtetasit A. L., duke i shkaktuar dëmin prej 15.000 lekë të rinj.

Nga hetimet e kryera, këta shtetas në bashkëpunim me njëri-tjetrin, më datë 28.02.2020, në lagjen ‘Isa Boletini’, Vlorë dyshohet se gjatë orëve të para të mëngjesit të kenë vjedhur pasqyrat e automjeteve Mercedes në pronësi të shtetasve D. H., Dh. A., A. L., dhe O. H.

Gjithashtu, më datë 08.02.2020, në lagjen ‘Pavarësia 3’ dyshohet të kenë vjedhur pasqyrat e Mercedesit në pronësi të shtetasit Y. G., (dëmi 12.000 lekë).

Dëmi i shkaktuar i 5 automjeteve në total arrin vlerën prej 127.000 lekë të rinj.

Materialet iu referuan Prokurorisë së Vlorës për veprime të mëtejshme.