Trafik droge, apo turizëm?! 15 shqiptarë të bllokuar në Ekuador dhe Kolumbi

Plot 15 shqiptarë i kanë kërkuar ndihmë kryeministrit Rama për t’u kthyer në Shqipëri. Ata kanë udhëtuar në Kolumbi, Ekuador dhe Meksikë që prej fillimit të janarit dhe pandemia i ka bllokuar.

Tashmë kërkojnë të kthehen në atdhe, por nuk ka asnjë mundësi. Gjithsesi, shqiptarët përmes e-mail në Ministrinë e Evropës dhe Punëve të Jashtme, si dhe vetë kryeministrit Rama kërkojnë gjetjen e mundësive për t’u kthyer.

Por, shqiptarët që udhëtojnë në këto vende më shumë se një udhëtim turistik kanë një tjetër motiv, që lidhet me trafikun e drogës, kontaktet e atjeshme me grupet kriminale dhe jo vetëm.

Kjo është përgjigja e një drejtuesi të lartë të Policisë së Shtetit, që u pyet nga nëse kanë informacion për një gjë të tillë, për kërkesën e riatdhesimit të shqiptarëve të bllokuar.

Këto konsiderohen vende të varfra dhe turizmi nuk është një sektor që prodhon të ardhura. Ato janë vende të njohura për trafikun e drogës. Por, në Kolumbi dhe Ekuador ka edhe shqiptarë që ndodhen në burgje, e për të cilët autoritetet shqiptare kërkojnë informacion, ose u japin të dhëna homologëve të tyre kur u kërkohet.

Sipas Policisë, shqiptarët operojnë në Guajakil, në qytetin-port më të madh të Ekuadorit, andej prej nga nisen anijet me drogë, që më pas ndahen në të gjithë Evropën.