Tragjedia, banorët në Thumanë kërkuan ndihmë 2 muaj më parë

Në Thumanë, aty ku bilanci nga tërmeti 6.4 ballë është i lartë, banorët tregojnë se kanë kërkuar ndihmë dy muaj më parë. Një prej të afërmve të një prej personave që ka mbetur i bllokuar nën rrënoja, tregoi se autoritetet ishin njoftuar për dëmtimet e pallatit që pas tërmetit të 21 shtatorit. Sipas këtij personi, asnjë masë nuk ishte marrë nga autoritetet për të ndihmuar banorët, disa prej të cilëve sot kanë humbur jetën. “(Banorët) i njoftuan (autoritetet) pas tërmetit të parë. Ku të shkonin? Të flinin në çadra? Asnjë masë nuk u mor”, tregoi një prej personave që tha se djali i dajës së tij ka mbetur i bllokuar në rrënoja. Aktualisht në Thumanë janë regjistruar tre viktima, por shumë persona të tjerë raportohet se janë ende nën rrënoja.