Tre gra u vranë mizorisht në një muaj, shteti merret me ”Anti-KÇK”

Qeveria ka nisur një aksion kombëtar të quajtur ”Anti-KÇK”, kundër kriminelëve dhe pasurive të tyre. Nga ana tjetër, krimet e natyrave të tjera për grabitje, apo për xhelozi, vazhdojnë të rrisin numrin e viktimave në vend. Vetëm brenda një muaji të vitit 2020, janë masakruar 3 gra, ngjarje të cilat kanë tronditur opinionin publik.

Në 5 janar të këtij viti, Drita Saliaj nga Mallakastra u vra barbarisht nga 3 të rinj, bashkëfshatarë të saj me qëllim grabitjen. Tre të rinjtë, Luis Saliaj, Ervis Zotaj dhe Sindi Shehaj shkuan në shtëpinë e Drita Saliajt në Mallakastër, e dhunuan, grabitën dhe e mbytën atë në rezervuar. Sipas dosjes së prokurorisë, tre të rinjtë në bashkëpunim me njëri-tjetrin ideuan të gjithë ngjajren dhe më pas shkuan tek shtëpia e 51-vjeçares për të grabitur dhe e vranë atë.

Në 10 janar një tjetër vrasje makabre u regjistrua në Paskuqan të Tiranës. Enkeleda Çapoku u vra nga kunati i saj, në dhomën ku flinte me vajzën dhe nënën, në zonën e Paskuqanit në Tiranë. Erdet Çapoku hyri me dhunë në shtëpinë ku banonte Enkeleda, burri I së cilës ndodhet në burg i dënuar për trafik droge. Ai e goditi disa herë me shkop kunatën e më pas me mjete prerëse i shkaktoi plagë të rënda, prej te cilave gruaja humi jetën. Enkeleda ishte pajisur me urdhër mbrojtje pasi kishte pasur konflikte me kunatin edhe herë të tjera.

Mbrëmjen e 2 shkurtit 2020, 45-vjeçari Lulzim Cuku vrau me thikë në zemër gruan e tij, Manjola Cukun, në banesën e tyre në Xhafzotaj të Durrësit. Lulzimi emigrant në Greqi, e masakroi gruan e tij në sy të tre fëmijëve, për xhelozi. Ai habiti në gjykatë teksa deklaroi se e vrau gruan pasi ajo ishte e bukur dhe se bëhej shpesh-herë xheloz. /ora news/