Tregu anglez i drogës, shtohet kontrolli i grupeve shqiptare

Pas artikullit që britanikja ”The Sun” i kushtoi shqiptarëve dhe aktivitetit të tyre të jashtëligjshëm në Mbretërinë e Bashkuar, këtë herë është agjensia britanike e Luftës kundër Krimit NCA. Ajo është e shqetësuar se grupet kriminale shqiptare kanë krijuar një ndikim të spikatur në radhët e krimit të organizuar, që operon në Britani dhe ka një kontroll të konsiderueshëm në tërë tregun e trafikimit të lëndëve narkotike në Britani.

Baronet shqiptarë të krimit, sipas medias vendase kanë marrë nën kontroll operacionet e shpërndarjes dhe trafikimit të drogës në Anglinë qendrore, pas kontrollit në Londër dhe rrethina. Në qytete kryesore të Anglisë qendrore si Notingham dhe Birmingam, grupet kriminale shqiptare theksohet se i drejtojnë vetë gjithë operacionet nga fillimi deri ne fund, qe nga korrierët e thjeshtë tek dërgesat më të mëdha të drogës në mbarë Britaninë.

Sipas shtypit ata nuk kanë besim tek të tjerët, por edhe nëse përfshijnë të huaj arrijnë të mbrohen nga risqet. Kokaina e tyre, thekson tabloidi Daily Mail, konsiderohet si më e pastra për nga cilësia krahasuar me kokainën e ofruar nga grupet e tjera kriminale në vend.

Përveç drogës, rrjetet kriminale shqiptare janë të përfshira edhe ne falsifikimin e dokumenteve dhe operacionet e trafikimit të qenieve njerëzore drejt Britanisë. Sipas NCA, që njihet ndryshe edhe si FBI-ja britanike, nga mbi 33 mijë pjesëtarë të dokumentuar të botës së krimit, shqiptarët ua kanë kaluar rumuneve, duke dalë në vend të tretë për nga kombesia sa i perket numrit të të burgosurve, në burgjet angleze, pas britanikeve dhe pakistanezëve.

Ajo që vihet re muajt e fundit dhe përbën një risi interesante është një pakësim ne dukje i asgjësimit të grupeve kriminale të drogës dhe rënie e numrit të proceseve gjyqësore ndaj trafikantëve shqiptarë të drogës në kryeqytetin britanik, krahasuar me vitin e kaluar.

Vitin e kaluar Agjencia Kombëtare e Krimit paralajmëroi se ”gangsterët” nga Shqipëria kanë tashmë një profil të lartë dhe kanë fituar kontroll të konsiderueshëm në të gjithë tregun e trafikimit të drogës në Mbretërinë e Bashkuar. Një prej tyre, shtetasi shqiptar Klodjan Copja u kap si rezultat i një hetimi proaktiv nga ”Task Force” që nga prilli i 2013 deri në korrik të 2015. Ndërsa Policia e West Midlands arrestoi 140 shtetas shqiptarë në 2017, 51 prej të cilëve u akuzuan për aktivitete që kishin të bënin me drogën.