Tritan Shehu nxjerr pamjet: Edi Rama duhet të fliste për “dhunuesit e adoleshentëve”!

Ish-deputeti i Partisë Demokratike Tritan Shehu ka reaguar ashpër lidhur me deklaratat e sotme të kryeministrit Edi Rama i cili justifikoi dhunën e ushtruar ndaj të rinjve shqiptarë gjatë kësaj jave, të cilët u ngritën në një revoltë të paprecedentë pas vrasjes së 25 vjeçarit Klodian Rasha nga policia.

“Rama foli për “kriminelë që po përdorin adoleshentët”; ai duhet të fliste për “dhunuesit e adoleshentëve”!

Një prej tyre është ky sadist i pështirë në foto e video pas asaj vrasjeje, fatkeqësisht pjesë e Policisë së Shtetit!

Shikojeni me vëmendje!

Një skuth, barbar e frikacak pa uniformë, pa distinktiv, që më pas vështron përreth me shpresë të fshehjes të asaj sjelljeje të pa imagjinueshme ndaj adoleshentit!

Një i dhunshëm, i cili përpiqet që “metodat” e tij t’ia “klonojë” dhe atij djaloshi “bashkëpunëtor” të hutuar, që po i “mëson zanatin”.

Ai kështu po detyron edhe një të ri të dhunojë një adoleshent.

Ky është keqpërdorimi i vërtetë i të rinjve për të cilin duhej të fliste Kryeministri- dhunë e krim i shumëfishtë!

Por siç ai tha sot këto pamje “nuk i paskan arritur”!

Për çudi “nuk kanë arritur” as te Prokuroria, që duhej të reagonte!

Sepse ai person njollos Shqipërinë e paraqet rrezikshmëri shoqërore jo vetëm për atë që po bën ndaj një adoleshenti të tmerruar, por për shumë më tepër, dhe sepse sadizmin e tij kërkon t’ia imponojë edhe një të riu tjetër, që është i detyruar ta ndjekë në këtë çmenduri.

Ndëshkimi i tij, sipas çdo ligji demokratik e gjykate të të drejtës, nuk ndihmon vetëm drejtësinë, viktimat e krimit, por dhe “nxënësit” fatkeqë të “mësimdhënies” së tij, nderin e nëpërkëmbur të Policisë!

Një video kjo e pa denjë për një Polici të një vendi në rrugën e integrimit, anëtar i NATO; më kujton veçse ato imazhe filmike të civilëve të Gestapos.

Rama për këtë duhej të fliste sot….!”, thekson ish-ligjvënësi demokrat, Tritan Shehu.