Tryezë bisedimesh Turqi-Greqi në Tiranë, reagon Mitsotakis: Ja çfarë kërkojmë nga Ankaraja

Lëvizje në aksin Turqi-Greqi. Ftesa e ministrit të jashtëm turk Mevlüt Çavuşoğlu për rinisje të bisedimeve mes dy shteteve, vjen edhe reagimi i kryeministrit grek, Kyriakos Mitsotakis.

Sipas tij, Greqia shpreson që bisedimet e saj me Turqinë do të rinisin aty ku ndalën në mars të vitit 2016.

“Pasi të specifikohet data e takimit, Greqia do të hyjë në bisedime hulumtuese dhe shpreh besimin që do të vazhdojmë aty ku e kemi lënë, pra në mars të 2016-ës”, tha Mitsotakis gjatë një konference të përbashkët me homologun e tij portugez Antonio Costa, raportojnë mediat helene.

Mitsotakis tha se Athina kërkon një marrëdhënie të frytshme me Ankaranë dhe shprehu shpresën se 2021 mund të jetë një vit i mirë për marrëdhëniet dypalëshe.

Ai gjithashtu tha se Greqia do të bisedojë mbi çështjen e zonave detare të diskutueshme. Ky do të ishte raundi i 61-të i bisedimeve hulumtuese midis dy vendeve.

Megjithatë kryeministri grek nuk përmendi në asnjë rresht të deklaratave të tij propozimin e bërë nga Edi Rama për mbajtjen e një tryeze dialogu në Tiranë.

Ditën e sotme, Turqia konfirmoi zërat e përfshirjes së kryeministrit shqiptar Edi Rama në bisedimet për uljen e tensioneve midis Ankarasë dhe Athinës.

Çavuşoğlu u shpreh i gatshëm të takojë Dendias në Tiranë me ftesën e Edi Ramës.

Gjatë konferencës së përbashkët me homologun e tij nga e ashtuquajtura Republika Turke e Qipros Veriore, Tahsin Ertuğruloğlu, Çavuşoğlu komentoi edhe ftesën e kryeministrit të Shqipërisë, Edi Rama, për të organizuar një takim në Tiranë me kryediplomatin grek Nikos Dendias. Por ky i fundit, në një postim në Twitter, mohoi të kishte marrë një ftesë nga pala turke.

“Nuk ka mbërritur asnjë ftesë nga Ministria e Jashtme e Turqisë për të përcaktuar një datë në lidhje me raundin e 61 të bisedimeve dypalëshe”, ishte reagimi i Ministrisë së Jashtme në Athinë.