Turizmi, Neritan Ceka: “Para ka sa të duash, por nuk e dimë se çfarë bëhet me to”

Në emisionin e parë Arena nga Dritan Hila, është folur dje për turizmin në vendin tonë, jo vetëm atë bregdetar por edhe kulturor e arkeologjik.

Në pjesën e katër të emisionin moderatori  Dritan Hila ka zhvilluar një bisedë me arkeologun e njohur Neritan Ceka.

Ceka, ka folur për historinë, për arkeologjinë, për objektet kulturore dhe ka vënë në pah problematikat e këtij turizmi.

Ai deklaroi se Ministria e Kulturës, ka lekë boll, por ajo që është problem është menaxhimi i tyre, sepse sipas tij nuk dihen se ku shkojnë.

Arkeologu ka ardhur menjë propozim konkret, se çfarë mund të bëjmë për të përmirësuar dhe vënë në funksion turizmin kulturor e arkeologjik.

“Para ka sa të duash, por nuk e dimë se çfarë bëhet me to. Vetëm Butrinti ka 1 milionë euro në vit, por nuk dihet se ku shkojnë. Duhet të krijohet një fondacion shtetëror, jam kundra partneritetit me privatin, nuk ka pse private të shfrytëzojë paaftësinë e shtetit për të qeverisur. 

Pra, të krijohet një fondacion, që i merr këto para për Kaninën, për shembull për ta vënë në funksion, për Orikumin, për Apolloninë, për Finiqin, për Antigonenë, Shkodrën e Lezhën. Modelin e kemi në Britaninë e Madhe, Është një fondacion shtetëror, drejtori emërohet nga ministria e Kulturës, ndërsa bordi nuk përbëhet nga njerëz të politikës, por nga njerëz që kanë kontribuuar në krijimin e kësaj pasurie”-ka deklaruar Neritan Ceka.