U gjet në hotel, zbulohet shkaku i vdekjes së të riut në Bulqizë

Mësohen detaje të reja për ngjarjen e ndodhur gjatë ditës së djeshme në Bulqize, ku një 32-vjeçar u gjet i vdekur në dhomën e një hoteli në qender të qytetit. Mësohet se viktima është Enri Brahaj nga Fieri, i cili punonte në Rrugën e Arbrit.

Ndonëse fillimisht policia tha në njoftimin zyrtar se vdekja dyshohet për shkaqe natyrale, burime të sigurta nga grupi hetimor bëjnë me dije për “BalkanWeb” se 32-vjeçari ka ndërruar jetë si pasojë e rrjedhjes së gazit që ka pasur në dhomën e hotelit ku po qëndronte viktima.

Policia në vendngjarje po verifikon kamerat e hotelit për zbardhjen e plotë të shkaqeve të ngjarjes si dhe pritet të marrë në pyetje pronarin e hotelit.

“Rreth orës 11.00, datë 25.01.2019, Policia e Bulqizës është njoftuar se është gjetur pa shenja jete në dhomën e një hoteli një 32-vjeçar banues në Fier.

Nga kqyrja paraprake e trupit të viktimës nuk janë konstatuar shenja dhune, dhe paraprakisht dyshohet se vdekja ka ardhur nga shkaqe natyrale.

Grupi hetimor ndodhet në vendngjarje dhe po punon për zbardhjen e shkakut të humbjes së jetës të 32-vjeçarit”- thuhej në njoftimin e policisë.