Vaksina anti-Covid, reagon Kompania “Pfizer”: Për Ballkanin vendos EMA, vaksina do të merret në dy doza
Kompania farmaceutike Amerikane Pfizer se bashku me gjermanen BioNtech janë realizuesit e vaksinës anti-Covid, BNT162b2, që sapo kanë nënshkruar marrëveshjen me Bashkimin Europian për shpërndarjen e 200 milionë dozave të para të saj, me mundësinë e marrjes dhe të 100 milionë dozave të tjera brenda vitit 2021.
Pfizer Italia, dega Italiane e kompanisë mëmë amerikane Pfizer, me një faturim botëror rreth 52,8 miliardë euro në vit e me mbi 90 mijë punonjës, përmes zëdhënësit të saj, i është përgjigjur interesimit të gazetares së RTV Ora në Romë mbi mënyrën e shpërndarjes së kësaj vaksine dhe në vendet jo anëtare të Bashkimit Europian.
Sipas kompanisë farmaceutike Pfizer shpërndarja e vaksinës anti-Covid, BNT162b2 , për vendet jo anëtare të Bashkimit Europian, do të bëhet në bazë të marrëveshjeve dypalëshe që çdo vend do të kryejë me shtëpinë farmaceutike.
Po a do të jenë vendet e Ballkanit pjesë e planit të shpërndarjes së vaksinës gjatë vitit 2021?
Sipas kompanisë farmaceutike Pfizer gjithçka do të varet nga vendimi që do të marrë Agjensia Europiane për barnat EMA.
Aprovimi i së cilës do t’i japë mundësi Komisionit Europian të drejtojë procesin e shpërndarjes së vaksinës në vendet anëtare të Bashkimit Europian si dhe në vendet të cilat kanë zgjedhur të jenë pjesë e kësaj marrëveshje.
Për RTV Ora, kompania Pfizer informon se vaksina BNT162b2 , do të merret në dy doza për çdo person e me një distancë prej 21 ditësh nga njëra -tjetra.
Në fazën e tretë të studimit të vaksinës kanë marrë pjesë 43 mijë persona të moshës nga 18 vjeç në 85 vjeç e me origjinë etnike të ndryshme.
Janë përfshirë në këtë fazë studimi dhe persona që vuajnë nga Hepatitit B e C si dhe persona që vuajnë nga një fazë kronike dhe e qëndrueshme e AIDS.
Zëdhënësi i Pfizer thotë për RTV ORA, se kanë planifikuar të prodhojnë rreth 50 milionë doza vaksine brenda vitit 2020 e 1.3 miliardë doza të tjera brenda vitit 2021.
Presidenti i Kompanisë Pfizer Albert Bourla ka komentuar se “Shprehet i kënaqur për rezultatin pozitiv që vaksina e tyre anti-Covid ka dhënë në këtë fazë të tretë të sutdimit me një efikasitet mbi 90% tek njeriu. Jemi përballë një kthese kaq të pritshme për t’i dhënë fund pandemisë globale. Ky është hapi i parë dhe thelbësor i punës për të furnizuar me një vaksinë të sigurtë e efikase.”
