Vaksina AstraZeneca në Shqipëri, Bino: Deri më tani s’ka pasur efekte anësore

Kryeministri Edi Rama, ministrja e Shëndetësisë, Ogerta Manastirliu dhe Shefja e Epidemiologjisë dhe Sëmundjeve Infektive në ISHP, Silva Bino inspektuan sot procesin e vaksinimit të mësuesve në qarkun e Durrësit.

Bino foli në lidhje dhe me vaksinën e AstraZeneca, e cila aktualisht është pezulluar në disa vende për motive sigurie në lidhje me disa efekte anësore tek disa persona të infektuar. Sipas saj, asnjë nga personat e infektuar me vaksinën e AstraZeneca në vendin tonë, deri më tani nuk ka shfaqur ndonjë efekt anësor.

”Edhe Agjencia Rregullatore e Mbretërisë së Bashkuar, që është një agjenci tepër strikte dhe që ka administruar me miliona doza apo agjencitë rregullatore të Kanadasë dhe Australisë që po e lejojnë vijimin e vaksinimit, janë agjenci të cilat japin një lloj sigurie më shumë. Por edhe gjatë procesit në vend, që nga e shtuna dhe deri tani, procesi ka ecur mirë, nuk ka pasur efekte anësore. Natyrisht që ka një lloj hezitimi nga gjithë publikimet që bëhen në media”, theksoi Bino.