Vdekja e mësuesit për shkak të Covid-19, ministrja Shahini shpreh ngushëllimet dhe bën apelin e fortë

Një mësues 47 vjeçar nga Pogradeci, pa sëmundje bashkëshoqëruese, pas 12 ditësh në terapi intensive në spitalin “Shefqet Ndroqi”, nuk e fitoi dot betejën me COVID-19.

Për lajmin ka reaguar e keqardhur edhe ministrja e Arimit, Besa Shahini.

Në një postim në rrjetet sociale, ministrja i shpreh ngushëllimet më të sinqerta familjarëve, nxënësve dhe kolegëve të tij.

“Ndihem shumë e keqardhur për mësuesin tonë nga Pogradeci që ka humbur jetën nga COVID-19 dhe i shpreh ngushëllimet më të sinqerta familjarëve, nxënësve dhe kolegëve të tij.

Me këtë rast, apeloj fort sërish që të shtojmë kujdesin duke ndërmarrë çdo masë parandaluese për frenimin e koronavirusit, si dhe duke zbatuar me seriozitet çdo rregull e protokoll shëndetësor që ka në thelb mbrojtjen e shëndetit tonë”, shkruan Shahini.