Veliaj: Kundërshtari ka ricikluar premtimet e pambajtuara në programin e tij
Kandidati i ASHE për Bashkinë e Tiranës, Erion Veliaj, ka prezantuar sot programin për transportin urban dhe parkimet në kryeqytet, ndërsa theksoi se në 4 vite janë bërë investime të pakëta pa cilësi. Ai u shpreh gjithashtu se me hartën e re administrative sipas të cilës Tiranës i bashkohen edhe 13 komuna të reja transporti publik nuk mund të funksionojë vetëm brenda unazës së kryeqytetit.
“Çdo ditë në Tiranë qarkullojë 140.000 makina. Mesatarisht secila makinë bën 45 rrugë në ditë. Ndodhin 800.000 udhëtime në ditë. Këto shkaktojnë problem të jashtëzakonshëm me trafikun. Në 4 vitet e fundit edhe transporti publik ka pasur degradim. Gjysma e banorëve të Tiranës përdorin autobusin dhe transportin publik. Tirana e re e 21 qershorit do jetë një Tiranë ku bashkohen 13 komuna të tjera. Nuk mund të kemi transport publik që i shërben vetëm unazës së Tiranës pa integruar edhe rrethet. Në 4 vite nuk u krijua një vend parkimi shtesë.” u shpreh Veliaj.
Kandidati i ASHE-së duke folur për vendet e parkimit, tha se në 4 vitet e shkuara nuk është ndërtuar asnjë vend i ri parkimi dhe për këtë akuzoi qeverisjen e Bashës. Duke firmosur kontratën me qytetarët për sigurinë rrugore, trafikun dhe parkingjet, Veliaj nuk nguroi të sulmojë programin e prezantuar dje nga kundërshtari i tij, Halim Kosova. Sipas Veliaj, ata kanë ricikluar premtimet e vjetra, të cilat jo vetëm nuk janë mbajtur por janë kthyer në barcoleta. “Pasi nuk i mbjatën premtimet në 4 vite po i riciklojnë të njejtat dhe thonë se janë të burrave të mirë. E mbani mend sherrin që u bë për nënkalimin tek sheshi Rilindja, kush kalon aty e kupton që trafiku nuk është lehtësuar..edhe flamujt u zbehen shtervani punoi dy. tre herë dhe sot është një sipërmarrje e shkatërruar. Ndërtimi i Unazës së Madhe vetëm tani kemi ecur shpejt”, tha Veliaj. Sipas tij, premtimi më spektakolar i tyre ishte ai për tramvajin që është kthyer në barcoletën më të përfolur.
“Dje dëgjova programin, po mirë nëse Luli e kishte premtuar tramvajin dhe projekti ishte i sukseshëm ky tjetri pse nuk e premtoi. Kjo tregon se ne jemi në drejtimini e duhur, pasi edhe ata vetë e kanë kuptuar që njerëzit nuk duan barcoleta por veprime konktrete”.