Vetëvrasja tek Shefqet Ndroqi/Drejtori i spitalit: Nuk kishte probleme psikike

Drejtori i spitalit Shefqet Ndroqi, ka reaguar lidhur me ngjarjen tragjike të ndodhur orët e para të mëngjesit të sotëm, ku një pacient i prekur me Covid-19, është hedhur nga kati i katërt i këtij spitali duke gjetur vdekjen e menjëhershme.

52-vjeçari që i dha fund jetës mëngjesin e së dielës nuk kishte shfaqur shenja të rëndimit psikologjik. Kështu u shpreh në një dalje për shtyp mjeku pneumolog Perlat Kapisyzi, i cili kërkoi që nga mediat të respektohet momenti i vështirë që po kalojnë familjarët dhe personeli shëndetësor.

“Është shtruar më datë 25 tetor dhe i është nënshtruar të gjithë ekzaminimeve sipas protokollit të trajtimit të pleomonisë sars cov 2. Në emër të spitalit i shprehim ngushëllimet më të ndjera dhe të sinqerta familjes. Sipas të dhënave që kemi nga shtrimi dhe deri në momentin e fundit, pacienti nuk paraqiste ndryshime apo shenja psikologjike jo normale. Ky është një moment shumë i vështirë dhe do të kërkonim mbështetje për të vazhduar këtë luftë në shpëtim të jetëve të pacientëve”,-tha ai.

Kapisyzi nuk iu përgjigj pyetjeve të gazetarëve se çfarë masash janë parashikuar për t’u marrë për faktin se në Spitalin Shefqet Ndroqi ky ishte rasti i tretë i vetëflijimit të pacientëve në më pak se katër muaj.