VIDEO/ Hapet shkolla verore për fëmijët shqiptarë që jetojnë në Itali, ministri tregon detajet

Shqipëria do të hapë shkollë verore për të gjithë fëmijët e shqiptarëve që jetojnë në Itali. Të gjithë ata që duan të aplikojnë mund ta bëjnë deri në 2 qershor. Hapja e shkollës verore “Jam Shqiptar” u bë me dije nga vetë ministri i Europës dhe i Punëve të Jashtme, Igli Hasani me anë të një postimi në rrjetet sociale.

“Shkolla verore “JAM SHQIPTAR” do të hapë së shpejti dyert e saj. Këtë verë do të mirëpresim nxënësit e gjuhës shqipe në Itali. Ku tjetër më mirë se në atdheun tënd do të mund të praktikosh gjuhën amtare.

Eja dhe ti këtë verë për një vizitë studimore në Shqipëri, ku do të mësosh akoma më shumë mbi historinë, artin, kulturën e traditën shqiptare, gjatë eksplorimit në natyrën piktoreske të atdheut tonë të bukur.

Nëse je nxënës i klasave shqipe në Itali, ndiq videon dhe dërgo sa më parë aplikimin tënd në adresën: shkollashqip@mfa.gov.al. Afati i fundit për aplikim: 2 qershor 2024”, shkruan ministri Hasani në postimin e tij.