VIDEO/ Komuniteti Mysliman i Shqipërisë shtron iftar për familjet në Gaza

Komuniteti Mysliman i Shqipërisë ka organizuar shpërndarjen e një iftari për qindra familje të zhvendosura në Gaza Strip, duke sjellë një mesazh solidariteti dhe mbështetjeje nga besimtarët shqiptarë.

Sipas njoftimit të KMSH-së, falë bujarisë së donatorëve dhe kontributit të besimtarëve në Shqipëri, u bë e mundur shpërndarja e një iftari të ngrohtë për rreth 1500–1600 persona. Përfituesit ishin kryesisht familje të zhvendosura, të cilat po përballen me vështirësi të mëdha si pasojë e situatës së rënduar humanitare në rajon.

Organizimi dhe shpërndarja e iftarit në terren u realizua në bashkëpunim me organizatën humanitare Swiss Barakah, e cila mundësoi përgatitjen dhe shpërndarjen e ushqimit për familjet në nevojë.

Nga zemra e Gazës u përcoll edhe një mesazh falënderimi për besimtarët shqiptarë dhe për Komunitetin Mysliman të Shqipërisë, për solidaritetin dhe mbështetjen e treguar në këtë muaj të shenjtë.

KMSH shprehu mirënjohje për të gjithë donatorët që kontribuan në këtë nismë humanitare, duke theksuar se ndihma për njerëzit në nevojë mbetet një nga vlerat më të rëndësishme të solidaritetit dhe humanizmit.