VIDEO/ Merr flakë makina e parkuar në Berat, shihni si mbulohet nga tymi zona e “Uznovës”

Një makinë ka marrë flakë mbrëmjen e sotme në lagjen “Uznovë” në Berat. Makina, tip fuoriatradë “Hunday”, ka qenë e parkuar në anë të rrugës, në aksin Uznovë-Spital dhe rreth orës 20:30 është përfshirë nga flakët. Fillimisht banorët dhe kalimtarët kanë konstatuar tymin që dilte nga kofanoja e mjetit dhe kanë njoftuar zjarrfikësen.

Pas pak minutash pjesa e përparme e makinës u përfshi nga flakët e zjarrit. Zjarri në mjet u lokalizua shpejt nga zjarrfikësit që mbërritën në vendngjarje, ndërkohë që tymi pushtoi gjithë lagjen Uznovë për minuta të tëra. Nga të dhënat e para dyshohet se flakët në motorin e mjetit kanë ardhur si pasojë e një defekti teknik, ndërsa janë shënuar vetëm dëme materiale.

I pyetur nga policia në vendngjarje, drejtuesi i mjetit që rezulton të jetë një elektroaut që ka servisin në këtë zonë ka deklaruar se makina kishte rrjedhje vaji.