VIDEO/ Ministri Balla në shoqatën e avokatëve shqiptaro-britanikë: Diaspora, rol në zhvillimin e Shqipërisë
Ministri i Shtetit për Marrëdhëniet me Parlamentin dhe drejtuesi politik i PS-së për diasporën, Taulant Balla, zhvilloi sot një takim me avokatë dhe konsulentë ligjorë në Shoqatën e Avokatëve shqiptaro-britanikë në Londër. Balla foli për rëndësinë e diasporës shqiptare dhe kontributin e saj të pazëvendësueshëm në zhvillimin ekonomik dhe social të Shqipërisë, si dhe për marrëdhëniet e shkëlqyera mes Shqipërisë dhe Britanisë së Madhe.
Balla theksoi gjithashtu se Shqipëria ka arritur një transformim të rëndësishëm ekonomik, me një dyfishim të prodhimit të brendshëm bruto në dekadën e fundit. Ai nënvizoi se ky zhvillim duhet të jetë gjithëpërfshirës dhe të përfitojë e gjithë shoqëria shqiptare. Ai gjithashtu vlerësoi rolin e diasporës jo vetëm për remitancat, por edhe për kontributin e saj në zhvillimin e turizmit dhe rritjen e imazhit të Shqipërisë në arenën ndërkombëtare.
”Një numër i konsiderueshëm i shqiptarëve të diasporës kthehen qoftë për pushime, qoftë për festa, duke gjetur mundësinë për të vizituar atdheun. Kjo sjell një kontribut të rëndësishëm për ekonominë e vendit, i cili sot ka një imazh krejtësisht tjetër krahasuar me 10 vite më parë. Shqipëria vlerësohet si i vetmi vend në Ballkanin Perëndimor që e ka tërësisht të përafruar politikën e saj të jashtme me Bashkimin Europian dhe aleatët e tjerë strategjikë, përfshirë Mbretërinë e Bashkuar. Me Britaninë e Madhe, ndajmë qëndrime të njëjta për çështjet globale të mëdha, si në kuadër të NATO-s, ku jemi kontribues për paqen dhe stabilitetin, ashtu edhe në pjesëmarrjen në aleancat globale kundër terrorizmit”.
