Viktima e koronavirusit qëndroi dy muaj në Bolonja; u kthye e infektuar

Shqipëria shënoi viktimën e parë të koronavirusit, ndërkohë që kanë dalë në pah disa detaje lidhur me të. Sipas burimeve bëhet e ditur se zonja, identiteti i së cilës nuk bëhet i ditur ka qenë në Bolonja tek fëmijët e saj dhe ka qëndruar për afro 60 ditë. Por është detyruar të kthehet, edhe pse Italia ishte në listën e vendeve me rrisk të lartë koronavirusi, pasi një i afërm i saj ka ndërruar jetë.

Sipas burimeve nga Spitali i Durrësit, gruaja ka marrë pjesë edhe në varrim, duke e shtuar më shumë frikën e infektimit të personave të tjerë. Ajo ka pasur probleme të tjera me shëndetin, por nuk u ka treguar mjekëve se ishte kthyer nga Italia.

Kjo ka bërë që vetë mjekët të futen tashmë në izolim, në pritje të analizave të tyre. Ndërkohë edhe familjarët e saj të vetëkarantinuar do t’u nënshtrohen analizave për të parë nëse janë apo jo të infektuar.