Viti i ri Akademik, studentët: Premtimet nuk janë mbajtur

14 tetori ishte dita e parë për studentët në këtë vit të ri akademik. 5000 studentë nisën vitin e ri Akademik në Universitetin ”Fan Noli” në Korçë. 700 studentë ulen për herë të parë në auditorë. Nga 53 programe studimi në fakultetet e ndryshme të këtij universiteti, 4 programe nuk kanë plotësuar ende kuotat minimale të regjistrimeve.

3 programet e mësuesisë në ciklin parashkollor, gjuhë letërsi dhe gjuhë frënge si edhe programi i hortikulturës në fakultetin bujqësor janë ato që ende nuk kanë plotësuar kuotat ndërsa shkak për këtë duket se ka qenë vendosja e notës mesatare. Thuajse një vit më parë edhe studentët e universitetit të Korçës u bënë pjesë e valës së protestave që përfshinë gjithë universitetet e vendit por në fillim të këtij viti të ri akademik ata pohojnë se kërkesat e tyre mbeten ende të paplotësuara.

Përfaqësues të këshillit studentor të Korçës jashtë kameras pohuan se kërkesat e tyre ende nuk janë plotësuar. Madje ata ju referuan konkretisht kartës së studentit, por edhe disa kërkesave sa i takon pasurimit të bibliotekave apo përmirësimit të kushteve në auditore por edhe kritere të tjera që janë kërkuar prej tyre vazhdojnë të jenë të papërmbushura. Nga ana tjetër janë studentët që vlerësojnë se kërkesat e tyre të përmbledhura nga qeveria në ”Paktin për Universitetin” nuk janë përmbushur. Më të shqetësuar janë studentët e ciklit master, pasi përfitues të përgjysmimit nga tarifa janë vetëm ata me mesatare mbi 9.