Viti i ri shkollor nis më 12 shtator, nxënësit do të kenë dhe 1 javë pushime në prill

Viti i ri shkollor për sistemin parauniversitar, do të nisë në datë 12 shtator 2022. Po ashtu fëmijëve do t’i shtohen edhe 1 javë pushim, që do të përkojë me fundin e semestrit të dytë. Sipas ministres Evis Kushi, do të shërbejë që fëmijët të marrin energjitë e duhura për t’u rikthyer më me energji për vlerësimet e nxënësve dhe përgatitjet në vijim.

”Sapo nënshkruam strukturën e vitit të ri shkollor 2022-2023 për të gjithë arsimin parauniversitar, i cili fillon më datë 12 shtator 2022. Për nxënësit dhe mësuesit e arsimit 9-vjeçar lajmi i mirë është se vitin e ardhshëm do të kenë edhe një javë më shumë pushim pas periudhës së dytë mësimore, nga data 3-9 prill 2023.

Në këto ditë nxënësit do të pushojnë por edhe luajnë dhe argëtohen për të marrë energji të reja për periudhën e fundit, ndërsa mësuesit do të kenë më shumë kohë për vlerësimet e nxënësve dhe përgatitjet në vijim. Suksese të gjithëve”.