Viti nis me një tjetër konflikt të rrezikshëm
Viti 2015 ishte një vit i konflikteve të vrullshme e të frikshme.
Por edhe viti 2016 ka nisur me tensione.
Arabia Saudite po përplaset me Iranin pas ekzekutimit të një kleriku të lartë shia.
Sauditët i kanë lënë dy ditë afat diplomatëve iranianë që të lënë vendin.
Të dielën, qeveria saudite bëri të ditur se ka shkëputur të gjitha lidhjet diplomatike me Iranin.
Irani e ka akuzuar Arabinë Saudite se po ndez tensionet në rajon.
Arabia Saudite dhe Irani janë respektivisht dy fuqitë e mëdha sunite dhe shia në rajon dhe palë kundërshtare sa i përket konflikteve në Siri dhe Jemen.
SHBA ka bërë thirrje për qetësi, duke kërkuar që të vazhdojë angazhimi diplomatik.
Sheiku Nimr al-Nimr dhe 46 persona të tjerë u ekzekutuan të shtunën pasi ishin dënuar për terrorizëm.
Në qytetin e lindjes së sheikut pati trazira.
Ndaj policisë u qëllua me armë. Si pasojë humbi jetën një civil dhe u plagos një fëmijë.
Policia është duke kërkuar për agresorët, duke theksuar se incidenti është një akt terrorist.
Myslimanët shia në këtë rajon të Arabisë Saudite, pretendojnë se janë nëpërkëmbur.