Vladimir Putin i shpall luftë ISIS, “duhet të ndëshkojmë terroristët”

Rusia i deklaron ISIS luftë. Pas sulmeve në Paris, Vladimir Putin i ka bërë thirrje komunitetit ndërkombëtar për të krijuar "një unitet të vërtetë për të përballuar me të keqen". Në një telegram dërguar François Hollande, presidenti rus shkruan: "Kjo tragjedi është provë e mëtejshme e natyrës barbare të terrorizmit, i cili është një sfidë për të gjithë njerëzimin." Por për të luftuar në mënyrë efektive "kundër kësaj të keqeje kërkohet një unitet i vërtetë në përpjekjet e të gjithë komunitetit ndërkombëtar". Putin gjithashtu ka ofruar "bashkëpunimin më të ngushtë me partnerët francezë në hetimin e krimeve të kryera në Paris". "Unë jam i bindur se udhëheqësit dhe autorët do të kenë dënimin e merituar."

"Nuk ka asnjë justifikim për aktet terroriste dhe nuk ka asnjë justifikim për ne, nëse nuk bëjmë më shumë për të luftuar shtetin islamik, al-Nusra”, ka deklaruar më pas edhe Ministri i Jashtëm rus, Sergej Lavrov, duke folur në Vjenë pas sulmeve në Paris.

Presidenti francez Francois Hollande, një ditë pas masakrave, në një fjalim drejtuar kombit të tij i quajti sulmet në Paris "akt lufte", "i planifikuar dhe i përgatitur jashtë vendit, me bashkëpunëtorë brenda" por që sipas tij hetimet do t’i identifikojnë.