Vrasja e pengut, dosja zyrtarisht në SPAK. Caktohen prokurorët

Në Gjykatën e Posaçme GJKKO, do të bëhët rivlerësimi i masës së sigurisë për pengmarrjen dhe vrasjen e Jan Prengës. Lidhur me këtë çështje Gjykata e Tiranës shpalli moskompetencën duke qenë se personat e arrestuar dhe ata të shpallur në kërkim lidhur me këtë çështje po hetohen nga SPAK si grup i strukturuar kriminal. Ky hetim nisi prej 17 janarit nga Prokuroria e Tiranës e cila ka urdhëruar 6 arreste dhe 5 persona të tjerë i ka shpallur në kërkim. Prokurorët që kanë në dorë këtë çështje janë Altin Dumani dhe Behar Dibra.

Kujtojmë se më parë Gjykata e Tiranes ka dhënë masën e sigurisë për 5 të arrestuarit për rrëmbimin dhe vrasjen e Jan Prengës, konkretisht:

-Bajram Hajti 64 vjeç arrest me burg pa afat
-Leonard Hajri 36 vjeç arrest me burg pa afat
-Olsi Turja 36 vjeç arrest me burg pa afat
-Elton Hajri 32 vjeç arrest me burg pa afat
-Festim Bexhdili arrest me burg pa afat

Këta persona akuzohen për “Rrëmbimi ose mbajtja peng e personit”, “Fshehja ose asgjësimi i kufomës”, “Veprime që pengojnë zbardhjen e të vërtetës”, “Përkrahja e autorit të krimit”, të kryera në bashkëpunim dhe “Armëmbajtja pa leje”.

Sipas asaj që deklaron policia dhe prokuroria, këta persona së bashku me Altin Hajrin, pronari i kompleksit ‘Golden’ në Shijak ku vdiq Jan Prenga mendohet se kanë ekzekutuar urdhrin nga “kokat” e bandës që kishin porositur rrëmbimin e Jan Prengës në Kamëz më 17 janar të këtij viti. Shkaku i kësaj ngjarje zanafillën e ka pasur në Angli, pasi vëllai i Jan Prengës Astrit Prenga mbante peng në Angli një sasi prej 278 kg kokainë dhe nuk e tregonte se ku e kishte çuar. Ky i fundit është ndodhet i arrestuar në Angli.

Ka dyshime të forta se porosia për rrëmbimin e Jan Prengës më 17 janar në Kamëz, është dhënë nga Dritan Rexhepi nga Vlora, i cili është person në kërkim për vrasjen e dy efektivëve të policisë në Shqipëri, ndërkohë që aktualisht ndodhet në një burg të sigurisë së lartë në Quito të Ekuadorit, për trafik droge. Deri më tani në kërkim për rrëmbimin e Jan Prengës janë shpallur në kërkim disa persona, ku tre prej tyre janë Gentian Doçi, Altin Hajri dhe Dritan Rexhepi.