Vrasja në Kavajë për një plep, policia merr nën ruajtje dy familjet

Viti 2016 ka nisur me disa ngjarje të rënda. Pas Shkodrës e Lezhës, një ngjarje tjetër e rëndë është shënuar në Kavajë.   

Në fshatin Luz i Madh Kavajë, një 31-vjeçar është vrarë me armë zjarri.

Nga të dhënat paraprake mësohet se viktima Ismet Xhani dhe autori Xhevdet Saraçi, banonin pranë njëri tjetrit në fshatin Luz i Madh. Ata kishin disa vite që kishin ardhur nga Peshkopia për të jetuar në Kavajë. Madje i përkisnin të të njëjtit fis.   

Por prej kohësh dy familjet kishin pasur konflikte mes tyre. Së fundmi sherri agravoi edhe më tepër për një plep që viktima e kishte prerë në tokën, afër shtëpisë së Saraçit.

Duke qenë se banesat e tyre ndodhen shumë pranë, pas vrasjes së sotme, policia ka marrë në ruajtje dy familjet. Kjo pasi nga situata është tensionuar, ekziston mundësia që familjarët e viktimës dhe autorit të përfshihen në një tjetër përplasje me pasoja edhe më të rënda.

Autori i vrasjes, Xhevdet Saraçi, u vu në pranga nga policia pak momente pas ngjarjes së rëndë.