Vrau grekun, shqiptari: Më kishte bërë magji. Avokatët: T’i bëhet ekspertizë për shëndetin mendor

”Më kishte bërë magji”, kështu tha gjatë seancës gjyqësore 32-vjeçari shqiptar që vrau me armë një 60-vjeçar në qytetin Kalyvia Thorikou në Greqi në dhjetor të 2020.

Gjatë seancës gjyqësore, shqiptari identiteti i të cilit nuk është bërë i ditur, ka rrëfyer se viktima 60-vjeçar të cilin e kishte komshi, i kishte bërë magji. Sipas tij, vetëm duke vrarë 60-vjeçarin do të “lirohej” nga magjia që i kishte bërë.

32-vjeçari shqiptar grindej shpesh me viktimën dhe bashkëshorten e tij, pasi kjo e fundit ishte administratore e pallatit ku banonin. Pasi vrau 60-vjeçarin, shqiptari u arratis në Shqipëri së bashku me nënën e tij.

Avokatët e autorit kanë kërkuar që 32-vjeçarit shqiptar t’i bëhet ekspertizë nëse vuan nga probleme të shëndetit mendor.