VV në zgjedhjet e 25 prillit, Abazi: Fitorja e Kosovës do reflektohet edhe këtu

Kryetari i Lëvizjes Vetëvendosje në Shqipëri, Boiken Abazi, i cili është njëri nga kandidatët zyrtarë në zgjedhjet e 25 prillit, tha se një nga arsyet pse shqiptarët duhet t’u besojnë është fakti se LVV është konsekuente në kauzat që ka mbështetur, të cilat nuk i ka braktisur siç kanë bërë subjekte e tjera politike në Shqipëri.

Sipas tij, ashtu si në Kosovë edhe në Shqipëri ekziston nevoja për një ndryshim urgjent të modelit ekonomik që siç shprehet është një neodiktat i tregut që ka kapur politikanë, media e institucione.

”Unë mendoj se në këto 30 vite kemi parë shumë dështime, kauza të braktisura. Aktualisht kemi një problem me qeverinë aktuale që i ka kapur të gjitha sistemet; ushtron ndikim edhe në sistemin e drejtësisë, ka miratuar një kod zgjedhor për të penguar opozitën dhe subjektet e vogla. Me këtë kod zgjedhor, për një mandat në Tiranë duhen minimalisht 16 mijë vota, pra është përpjekur të shtojë pengesat për alternativa të reja”, tha Abazi.