Zhvillohet tryeza e dytë e OSBE-së për Reformën Zgjedhore

Sot në orën 10:00 do të zhvillohet tryeza e dytë e organizuar nga OSBE-ja për reformën zgjedhore në nivel teknik. PD-ja, ashtu si në 25 shtator ka pranuar që të marrë pjesë në tryezë, ndërsa përfaqësuesi është i njëjta, Ivi Kaso. Është siguruar axhenda e mbledhjes, ku do të diskutohet për gjetjet dhe rekomandimet kryesore mbi rregullimet e financimeve të partive politike dhe fushatës së zgjedhore në Shqipëri. Tryeza po zhvillohet me dyer të mbyllura.

Partia Demokratike ka deklaruar se nuk e njeh Komisionin e Posaçëm Parlamentar duke kërkuar qe reforma të realizohet nga PS dhe PD me praninë e ndërkombëtareve. Por ndërkombëtarët nuk e kanë pranuar thirrjen e opozitës, duke kërkuar që të jenë vetë partitë që të arrijnë mirëkuptimin, teksa ambasadori i OSBE-së ka deklaruar se nëse opozita kërkon mund të japë vetëm ekspertizë për këtë reformë.

Përballë kësaj situate, OSBE-ja pritet që të jetë ndërmjetësja mes draftit që po përgatitet nga Komisioni i Posaçëm i Reformës Zgjedhore dhe atij tryezës paralele të opozitës, PD-së me aleatët për të synuar harmonizimin dhe miratimin në parlament. Pak ditë më parë shumica vendosi që të shtynte afatin e Komisionit të Reformës Zgjedhore deri në fund të muajit shkurt.