Zjarri në Dukat, ndërhyrje edhe nga ajri për shuarjen e flakëve

Vazhdon zjarri në fshatin Dukat të Vlorës. Prej katër ditësh zjarri i cili ka përfshirë zonën e malit mbi fshatin Dukat, ka djegur shkurre, pemë të ndryshme bredha dhe pisha.

Zjarrfikëset janë duke punuar për shuarjen e flakëve por terreni është mjaft i vështirë. Forcat e armatosura dhe banorë te zonës janë duke luftuar me flakët. Ndërkohë që mbrëmjen e sotme ka mbërritur dhe një helikopter i FA i cili po hedh ujë për shuar zjarrin.

Flakët e zjarrit të ndihmuara dhe nga era që fryn nga jugu kanë shkuar në kurorën e malit, por rrezikshmëria është nëse drejtimi i erës ndryshon nga veri – lindje kjo bën që flakët të përparojnë drejt parkut kombëtar të Llogarasë.