Shkëndijë elektrike në urgjencën e Durrësit, drejtoresha: S’ka dëme materiale dhe as njerëzore

Spitali i Durrësit ka reaguar zyrtarisht pasi mesditen e sotme, për herë të katër reparti i Urgjencës u përfshi nga flakët. Në deklaratë thuhet se një shkëndijë elektrike, e cila ka shkaktuar tym në ambientet e urgjencës por fatmirësisht pa pasoja. 7 pacientët që po merrnin shërbim në Pavionin e Urgjencës janë transferuar në ambiente të tjera.

Drejtoresha e spitalit. Nadire Kërtusha thotë se nuk ka pasur zjarr por vetëm tym nga shkëndija elektrike. ”Sipas ekspertëve të zjarrfikësve ka pasur një shkëndijë elektrike në pjesën e radiologjisë. Nuk ka dëme as në aparate dhe as të personelit sepse sapo kanë parë tym kanë lënë repartin. Zjarrfikësit po merren me ventilimin e ambienteve. Nuk ka pasur zjarr por vetëm tym nga shkëndija”.

Kjo është hera e katërt që digjet ky spital. Më herët, në janar të këtij viti, një masë në kabinën elektrike prej ngarkesës në rrjet bëri që një zjarr i madh të përfshinte repartin e neurologjisë dhe më pas vijoi deri në katin e katërt për shkak të strukturës me një kolonë të spitalit.

Dy herët e tjera, spitali është djegur në vitin 2013 dhe në vitin 2015. Sërish shkak është bërë shpërthimi elektrik për nga mbingarkesa. Herën e parafundit, në janar të këtij viti, prokuroria nisi dhe hetimet duke parë herët e shumta që flakët përfshinin këtë godinë, por siç duket ende nuk ka gjetur ndonjë fajtor.