Zv/ministrja e Shëndetësisë, Rakacolli: S’ka urdhër për mbylljen e spitalit Covid 4

Zv/ministrja e Shëndetësisë, Mira Rakacolli ka hedhur poshtë lajmin për mbylljen e spitalit Covid 4. Kryetarja e Komitetit Teknik të Ekspertëve, sqaroi se pavarësisht rënies së ndjeshme të numrit të shtrimeve, spitalet hapen dhe mbyllen me urdhra dhe nuk ka asnjë urdhër për mbylljen e spitalit Covid 4.

Rakacolli tha se politika kryesore e vaksinimit lidhet me grupmoshat dhe grupet e rrezikut. ”Ne do të vazhdojmë me mbarimin e grupmoshave mbi 70 vjeç dhe besoj që javën tjetër do të ulet grupmosha”,-tha zv. ministrja. Sa i takon imunitetit të tufës, ajo theksoi se kjo ndodh kur arrin imunitetin mbi 70% e popullsisë gjë që për momentin nuk është duke ndodhur në Shqipëri.

Sot u tha se nisur nga ulja e rasteve, u mbyll spitali Covid 4 i vendosur në mjediset e ish-Universitetit Kristal, por që do të jetë në gatishmëri në rast se situata rëndohet. Ditët e fundit shtrimet në këtë spital kanë qenë shumë të vogla dhe për këtë arsye autoritetet po mendojnë pezullimin e punës, por që gatishmëria do të vijojë të jetë e lartë nëse situata do të pësojë një përkeqësim të situatës. Gjatë muajve të dimrit, autoritetet spitalore dhe ekspertët vendosën të hapin dhe 3 spitale rajonale për trajtimin e pacientëve me Covid, për shkak të rritjes së numrit të të infektuarve.