12 vite në pushtet, sfida e Orban mes BE dhe Rusisë. Sot zgjedhjet parlamentare në Hungari

Kjo e dielë është një sfidë kjo e madhe për kryeministrin aktual Viktor Orban, i cili është në qeverisje të vendit prej 12 vitesh. Pasi hodhi votën në kuti mëngjesin e së dielës, Orban tha se ai pret një fitore të madhe në këto zgjedhje parlamentare. “Unë kam punuar prej shumë muajsh dhe prandaj pres një fitore të madhe , kjo është se çfarë i duhet vendit”.

Orban po kërkon mandatin e tij të pestë në detyrë dhe të katërtin me radhë. Kundërshtari i tij kryesor në këto zgjedhje është Peter Marki-Zay, që kryeson një koalicion opozitar.

Orban prej kohësh ka qenë në mosmarrëveshje me Komisionin Evropian. Kritikët e tij thonë se ai e ka larguar vendin nga vlerat kyçe të BE-së, duke përfshirë minimin e sundimit të ligjit dhe fillimin e politikave kundër emigracionit dhe kur Brukseli kritikoi një ligj të ri në Hungari që ndalon “shfaqjen ose promovimin” e homoseksualitetit, Orban akuzoi liderët evropianë se sillen si “kolonialistë”.