95% efektive, vaksina e Pfizer dërgohet sot për miratim

Pfizer dhe BioNTech thanë se sot do të kërkojnë një autorizim emergjent të përdorimit të vaksinës së tyre të koronavirusit nga Administrata e Ushqimit dhe Barnave në SHBA. Kjo është vaksina e parë e koronavirusit që kërkon një miratim në Shtetet e Bashkuara. Kompanitë deklaruan se vaksina e tyre, e njohur si BNT162b2, do të jetë potencialisht e disponueshme për përdorim në Shtetet e Bashkuara nga mesi deri në fund të dhjetorit.

“Regjistrimi në SHBA përfaqëson një moment të rëndësishëm në udhëtimin tonë për të shpërndarë një vaksinë COVID-19 në botë dhe tani kemi një pamje më të plotë të efikasitetit dhe profilit të sigurisë së vaksinës sonë, duke na dhënë besim në potencialin e saj”, tha ceo i Pfizer, Albert Bourla.

Dorëzimi në FDA bazohet në rezultatet e provës klinike të fazës 3 të vaksinës së Pfizer, e cila filloi në Shtetet e Bashkuara më 27 korrik dhe regjistroi më shumë se 43,000 vullnetarë.

Analiza përfundimtare zbuloi se vaksina e koronavirusit ishte 95% efektive në parandalimin e infeksioneve, madje edhe tek të rriturit e moshuar, dhe nuk shkaktoi efekte serioze anësore, njoftuan Pfizer dhe partneri i saj gjerman, BioNTech këtë javë.

Kompania tha se reth 42% e pjesëmarrësve globalë dhe 30% e pjesëmarrësve të SHBA-së, në testimet e vaksinës kanë formime raciale dhe etnike të ndryshme, dhe 41% e pjesëmarrësve globalë dhe 45% të pjesëmarrësve në SH.B.A. janë të moshës 56 deri 85 vjeç.