Athinë, anarkistët sulmojnë rajonin e policisë me bomba molotov

Një grup anarkistësh kanë sulmuar të martën pas mesnate rajonin e policisë të Omonias, sheshin e njohur në qendër të Athinës.

Sipas njoftimeve kanë qenë rreth 20 persona me fytyra të maskuara që në orën 02:30 hodhën bomba molotov në fasadën e godinës.

Nuk janë raportuar dëme apo të lënduar.

Më pas anarkistët shkuan disa metra më tej në godinën e Ministrisë së Tregtisë dhe hodhën gjithashtu bomba molotov.

Duke u tërhequr për në sheshin ‘Eksarkia’, ku kanë bazën e tyre anarkistët sulmuan një patrullë të forcave speciale të policisë.

Për disa orë është ndërprerë qarkullimi në rrugën ‘Patision’, ndërsa policia nuk ka kryer asnjë shoqërim.