Avioni rus futet në hapësirën e NATO-s, sfidon bombarduesin amerikan

Një avion Su-27, një nga mjetet më moderne të ushtrisë së Moskës, i është afruar një bombarduesi amerikan jo më larg se 15 metra, në një akt sfide që tashmë po përsëritet disa herë radhazi.

Incidenti i fundit i avionëve rus me ato të NATO-s ka ndodhur ditën e premte, por vetëm ditën e djeshme Pentagoni ka publikuar pamjet e filmuara nga një bombardues B-52 amerikan që po fluturonte sipër Danimarkës, në ishullin Bornholm, 90 milje nga kryeqyteti Kopenhagën.

Sipas deklaratave të NATO-s, incidenti paraqitet shqetësues sepse avioni rus ka thyer pa asnjë paralajmërim kufirin shtetëror të një vendi sovran si Danimarka, njëkohësisht edhe një hapësirë e kontrolluar nga NATO.

Sakaq, Moska mohon këtë mundësi, duke deklaruar se avioni ka kaluar në një korridor ndërkombëtar, duke mos thyer asnjë rregull.

Avioni rus u ngrit nga baza ushtarake e Kaliningradit, enklava ruse midis Polonisë dhe Lituanisë që gjithmonë e më shumë po shndërrohet në makth për NATO-n, nga afërsia që i lejon avionëve të Moskës të arrijnë në pak minuta në të paktën 8 kryeqytete europiane.