Banda e armatosur merr peng kombëtaren e futbollit (VIDEO)

Skuadra përfaqësuese e Belizes në futboll u mbaj peng pas zbarkimit të saj në Haiti. Momentet e tmerrit dhe terrorit u dokumentuan nga një video e regjistruar nga vetë futbollistët. Pas zbritjes së avionit në Karaibe, autobusi i skuadrës u nis drejt hotelit ku do të akomodoheshin, të shoqëruar nga katër policë me motorë. Por, udhëtimi i tyre u ndërpre nga bandat lokale.

Mbi motorë dhe të armatosur me pushkë dhe automatikë, ata i bllokuan rrugën autobusit, duke mbajtur për disa minuta peng përfaqësuesen e Belizes. Eskorta e policisë e pa veten në një situatë ku i’u nevojit të negocionte me agresorët, që në fund u bindën t’i hapnin rrugën mjetit. Përpara ndeshjes së programuar më 25 mars, futbollistët dhe stafi i Belizes janë të sigurt në hotel.

Federata e Belizes reagoi për ngjarjen, duke saktësuar se të gjithë janë mirë dhe nga incidenti nuk ka të lënduar. Ata kontaktuan FIFA-n si edhe Konfederatën e Amerikës Veriore, Qendrore dhe të Karaibeve, për të kuptuar nëse është e mundur që ndeshja të luhet në një vend më të sigurt.