Bashkimi Europian “ngrin” fitoren e Viktor Orban

BE-ja thotë se Komisioni Europian ka nisur procedurë disiplinore kundër Hungarisë, që mund të çojë në ngrirjen e fondeve të bllokut europian për shkak të shkeljeve të normave demokratike nga ana e Budapestit. “Fitorja është aq e madhe sa mund të shihet dhe nga hëna, jo më pastaj nga Brukseli”, deklaroi pas fitores kryeministri hungarez Viktor Orban.

Komisioni Evropian tha se do të përdorë mekanizimin e sundimit të ligjit, që nuk është përdorur asnjëherë, me qëllim që të parandalohej keqpërdorimi i fondeve të Bashkimit Europian.

Ky mekanizëm i ri është vendosur për t’i dhënë fuqi BE-së që të ndërpresë financimin e shtete që nuk ndjekin rregullat thelbësore të bllokut evropian. Për këtë mekanizëm ishin pajtuar të 27 shtetet anëtare në fund të vitit 2020, pavarësisht hezitimit nga Hungaria dhe Polonia.

Fitorja e Orbanit erdhi pavarësisht që BE-ja e ka kritikuar atë për vite me radhë për sistemin e prokurimit publik, për konflikte të interesit, politikat e migracionit, për pavarësinë e gjyqësorit si dhe për kufizimet në lirinë e mediave.