Blinken rikthehet në Izrael. Bisedime kokë më kokë me Netanyahun, në një përpjekje për një armëpushim të ri
Sekretari amerikan i Shtetit, Anthony Blinken do të zhvillojë sot bisedime me lidershipin politik izraelit, të cilit pritet t’i bëjë presion për një armëpushim të ri, që do të lejonte lirimin e më shumë pengjeve, ndërsa lufta midis Izraelit dhe Hamasit hyn në muajin e pestë të saj.
Pesë muaj, pesë turne në Lindjen e Mesme për kreun e Departamentit të Shtetit. Dje ai ishte në Egjipt dhe Katar, dy vendet që kanë marrë një rol ndërmjetësues, përpara se avioni i tij të mbërrinte në Tel Aviv në mbrëmje.
Hamasi konfirmoi më herët dje se kishte dërguar një përgjigje, pa elaboruar, në Kajro dhe Doha pas shqyrtimit të propozimit për një armëpushim të ri të hartuar në fund të janarit në Paris, gjatë negociatave ku morën pjesë drejtori i saj CIA William Burns dhe përfaqësues të Katarit, Egjiptit dhe Izraelit.
Sipas një zyrtari amerikan, i cili foli në kushte anonimiteti, Blinken u informua mbi përgjigjen e Hamasit nga emiri i Katarit të martën kur ata u takuan në Doha.
Sipas një burimi të AFP-së në lëvizjen islamike palestineze, propozimi parashikon tre faza, e para prej të cilave do të përfshinte një armëpushim gjashtë-javor, lirimin e 200 deri në 300 të burgosurve palestinezë në këmbim të 35 deri në 40 pengjeve të mbajtura në Gaza, gjithashtu, si hyrje kamionësh me ndihma humanitare.
Kryeministri i Katarit, Mohammed bin Abdul Rahman Al Thani tha se ai ishte “optimist” dhe e përshkroi përgjigjen e Hamasit si “përgjithësisht pozitive”, duke shtuar se ajo përmban “komente të caktuara”.
Një deklaratë e përbashkët nga zyra e kryeministrit izraelit Benjamin Netanyahu dhe Mossad thotë se përgjigja e Hamasit iu “kalua” nga Katari agjencisë së spiunazhit të Izraelit, e cila “po e studion tërësisht atë”. Netanyahu pritet të zhvillojë bisedime kokë më kokë me Blinken sot, saktësisht katër muaj pas shpërthimit të konfliktit.
Shkaku i kësaj lufte ishte një sulm i paprecedentë nga krahu ushtarak i Hamasit në sektorët jugor të territorit izraelit më 7 tetor, i cili vrau 1,163 njerëz, kryesisht civilë, sipas një raporti të AFP-së bazuar në deklaratat zyrtare të autoriteteve.
