Britani e Madhe, distancimi social në aeroporte është i pamundur

Distancimi social në aeroporte është fizikisht i pamundur, ndaj duhet kërkuar një zgjidhje tjetër për ta bërë udhëtimin ajror më të sigurt. Kështu është shprehur shefi i aeroportit “Heathrow” në Britaninë e Madhe.

“Distanca sociale nuk funksionon në asnjë formë në transportin publik, e jo më aeroporte. Për këtë arsye është e domosdoshme që aeroportet të përfshijnë kontrollin shëndetësor dhe pasagjerët detyrimisht të mbajnë maska, ” tha Holland Kaye.

Shefi ekzekutiv i aeroportit “Heathrow” nënvizoi se derisa të mund të zhvillohet një vaksinë kundër koronavirusit, aeroportet duhet të përforcojnë masat për të minimizuar infeksionin e sëmundjes. Ai thekson se personat që pas ekzaminimit shëndetësor rezultojnë me temperaturë të lartë, nuk mund të lejohen të fluturojnë.

I cilësuar si aeroporti më i ngarkuar në Evropë, sa i përket numrit të lartë të pasagjerëve, “Heathrow” përbën shqetësim të shtuar edhe për punonjësit. Sindikata e punëtorëve shprehet se ata kanë frikë se mund të infektohen me virusin vdekjeprurës nga pasagjerët që vijnë nga vende ku Covid-19 është shumë i përhapur.

Vetëm në dy javët e fundit, tre anëtarë të GMB që punojnë në aeroportin Heathrow kanë humbur jetën nga koronavirusi. Ndaj kërkohet që aeroporti të detyrojë distancimin social për të mbrojtur stafin dhe pasagjerët.