Çfarë ka Bill Clinton? Shqetësim për shëndetin e ish-presidentit amerikan

Ish-presidenti i SHBA-së, Bill Clinton ka ngjallur shqetësime të reja në lidhje me shëndetin e tij pasi u pa me gruan Hillary, në Hamptons duke mbajtur një defibrilator portativ. Sipas Daily Mail, çifti u pa në aeroport duke mbajtur një pajisje që dukej si një çantë mjekësore Propaq MD Air Medical Bag, duke ngritur pyetjet në lidhje me shëndetin e dobët të ish-Presidentit 79-vjeçar.

Në vitin 2004, ai pësoi një atak në zemër që çoi në një operacion bypass, dhe në vitin 2010 u shtrua përsëri në spital me dhimbje në gjoks dhe iu vendos një stent.

Kurse në vitin 2021 u shtrua në spital me një infeksion të rëndë të traktit urinar që i ishte përhapur në gjak, ndërsa në dhjetor 2023, ai kaloi disa ditë në Spitalin Universitar MedStar Georgetown në Uashington për shkak të gripit.

Në paraqitjen e tij të fundit, ai mbante veshur një xhaketë blu dhe një kapelë ngjyrë bezhë, i shoqëruar nga roja e tij personale. Hillary Clinton ishte veshur me një xhaketë të zezë mbi një kostum blu. Deri më tani, Zyra e ish-Presidentit nuk ka komentuar.