Covid-19/Fauci tregon 3 faktorë që kanë ulur numrin e vdekjeve në SHBA

Edhe pse shifrat e infektimeve nga Covid vijojnë në të jenë të larta, Dr. Anthony Fauci, eksperti kryesor i sëmundjeve infektive në SHBA tha se vdekjet kanë psuar rënie.

Gjatë një takimi të shtunën me Shoqatën Amerikane të Mjekëve, Fauci veçoi tre faktorë të lidhur me këtë fenomen: “Mosha e pacientëve, përvoja e mjekëve me virusin dhe ilaçet më të mira.

Fakti që të rinjtë tani po infektohen, është gjithashtu një faktor që ul nivelin e vdekjeve”, tha ai.

Gjithashtu Fauci tha se në disa pacientë, simptomat e Covid janë parë të zgjasin edhe pas disa muajsh.

“Diku mes 25% deri në 35% të pacientëve Covid-19 kanë simptoma të zgjatura si lodhja, dhimbjet e muskujve, çrregullimet e gjumit e të tjera edhe pas shërimit. Ne e dimë absolutisht të sigurt se ekziston një sindromë post Covid-19”, tha ai.

Është e paqartë saktësisht se sa mund të zgjasin simptomat, por Fauci tha se ato janë vërejtur për muaj me radhë pas një infeksioni fillestar.