Dënohet trashëgimtari i Samsung-ut

Trashëgimtari i Samsung Lee Jae-yong është dënuar me 5 vjet burg nga një gjykatë në Korenë e Jugut.

Lee është akuzuar për korrupsion në një skandal që gjithashtu çoi në shkarkimin dhe gjykimin e ish-presidentes së vendit, Park Geun-hye.

Ai është ndaluar nga policia koreano-jugore në shkurt, pasi mbi të rëndonin akuza si marrja e ryshfetit, përvetësimi dhe fshehja e pasurive jashtë shtetit.

49-vjeçari është akuzuar se ka dhuruar fonde në mbështetje të organizatave jo-qeveritare të menaxhuara nga Choi Soon-sil, një mikeshë e ish-presidentes Park, në këmbim të favoreve politike.

Trashëgimtari i gjigandit teknologjik ka mohuar të gjitha akuzat kundër tij. Sipas avokatit të Lee, ata tashmë do të apelojnë vendimin e gjykatës. Sidoqoftë, ky vendim përfaqëson një goditje të rënë për perandorinë më të madhe dhe më të njohur të biznesit koreano-jugore. Që prej verdiktit, aksionet e Samsung ranë me 1%.

Dënimi ngre dyshime lidhur me udhëheqjen e këtij konglomerati nga Lee Jae-yong, i cili ka vepruar si kryetar i firmës që prej 2014. Ndërkohë, e gjithë çështja ka tërhequr vëmendjen e publikut koreano-jugor pasi vjen në një kohë të pakënaqësisë dhe zemërimit në rritje ndaj bizeseve të mëdha, të njohura si “chaebol”.