DW: Angela Merkel, menaxhuesja e suksesshme e krizave

Merkel mbajti konferencën tradicionale të verës, të fundit për të si kancelare. Vetia e Merkelit: Në kriza ajo tregohet e patundur, shkruan Katharina Kroll.

Jo sallë e tejmbushur, asnjë lloj trazire e të qeshura, pak kamera. Rregullat e distancës respektohen me rreptësi, shumë pyetje vijnë nga hapësira virtuale. Kjo konferencë shtypi që mbahet tradicionalisht si çdo verë është ndryshe nga të tjerat. Vetëm një person vepron me rutinë, si gjithmonë. Angela Merkel. E fokusuar dhe faktike ajo prezanton strategjinë e saj të veprimit. Dhe rrezaton qetësi e siguri, e kundërta e të papriturave që sjell me vete pandemia.

Tre mesazhe të kancelares

Konferenca e shtypit është për kancelaren skena, që asaj i duhet për të bindur qytetarët në krizën e Coronës. Tre mesazhe të qarta ka Merkel me vete: Fëmijët nuk duhet të bëhen humbësit e krizës, ekonomia duhet të vazhdojë të prodhojë dhe shoqëria duhet të ruajë unitetin. Këto janë temat, që i preokupojnë qytetarët në këto momente.

Si një studiuese shkencash e shoqëron Angela Merkel vendin përgjatë pandemisë, e këtë me vetëbesim të dukshëm. Kuptohet, se rifitimi i popullaritetit e ka forcuar Merkelin. Vlerat në sondazhe janë sërish në nivele rekord. Si menaxhere e krizave ajo ka fituar pikë. “Çdo ditë vlen”, tha Merkel. Ajo nuk dëshiron të humbasë kohë e do t’i çojë shumë gjëra përpara në vitin e saj të fundit qeverisës. Por realiteti është ndryshe: Temat kardinale të së ardhmes si ndryshimi i klimës, digjitalizimi, që ishin me rëndësi që para krizës së Coronës, nuk janë më në qendër. Impulse të reja nuk ka, por të gjitha pyetjeve ajo iu përgjigjet e sigurtë dhe me detaje.

Të qëndrojmë në dialog

Edhe në politikën e jashtme, presidentja e presidencës së BE, Merkel i qëndron strategjisë së njohur: ruajtja e dialogut. Me partnerin e vështirë, Rusinë, kinezët e plotfuqishëm, dhe manipuluesin e zgjedhjeve në Bjellorusi. Përpjekja për të ruajtur të gjitha kanalet e bisedimeve, edhe pse qëndrimet mund të jenë shumë larg. Aty shfaqet Angela Merkeli e parehatshme, që këmbëngul në zgjidhje dhe kërkon përgjigje, që shpesh edhe nuk i merr.

Në fund mbetet përshtypja: Kancelarja di të menaxhojë kriza, por Corona mbetet një superkrizë. E atë që nuk do arrijë ta zgjidhë dot kjo qeveri, mbetet si detyrë për qeverinë e ardhshme federale gjermane.