Dyshime ndaj social-demokratëve

Partia Social-Demokrate e Gjermanisë është hasur me rezultate të ndryshme nga sondazhi i përmuajshëm DeutschlandTrend. Teksa 57% e gjermanëve shprehin besimin e tyre se partia e qendrës së majtë vijon të kuptojë problematikat e qytetarëve të vendit, shumica prej tyre nuk mendojnë se Social-Demokratët janë të bashkuar. Më keq për partinë është fakti se 60% e votuesve kanë ngritur dyshime nëse Social-Demokratët janë të aftë të qeverisin. I vetmi lajm i mirë për Social-Demokratët është rritja modeste me 2 pikë në mbështetjen për partinë, që disa javë më parë regjistroi një minimum historik me vetëm 16% të mbështetjes.

Në të kundërt, ¾ e votuesve mendojnë se kancelarja Angela Merkel dhe blloku i saj janë të duhurit për të udhëhequr Gjermaninë. Besimi tek konservatorët duket i patundur, pavarësisht faktit se 55% e të anketuarve mendojnë se forca e Merkel nuk i kupton shqetësimet e popullit gjerman. Ndërkohë, mbështetja për bllokun konservator është rritur me 1 pikë.

Sondazhi i financuar nga transmetuesi gjerman ARD, vjen vetëm pak ditë përpara se partia e qendrës së majtë të shpallë rezultatin e votimit, nëse anëtarët pranojnë marrëveshjen për koalicion me konservatorët e kancelares Angela Merkel, akord i mundimshëm i arritur vetëm një muaj më parë. Burime nga Social-Demokratët bëjnë me dije se 60% e anëtarëve të partisë parashikohen të votojnë në favor të marrëveshjes së re qeveritare.