“E mirë për të gjithë Evropën”/ Kryeministri britanik reagon pas marrëveshjes për Brexit

BE dhe Mbretëria e Bashkuar kanë arritur një marrëveshje tregtare pas Brexit, duke i dhënë fund muajve të mosmarrëveshjeve mbi të drejtat e peshkimit dhe rregullat e ardhshme të biznesit.

Në një konferencë shtypi në Downing Street, Boris Johnson tha: “Ne kemi marrë përsëri kontrollin e ligjeve dhe fatit tonë“.

Kryeministri shtoi se megjithëse argumentet kishin qenë “të ashpra” ishte një “marrëveshje e mirë për të gjithë Evropën”, duke nxitur punë dhe prosperitet.

Shefja e BE, Ursula von der Leyen tha se ishte një marrëveshje “e drejtë dhe e ekuilibruar”.

Në një konferencë shtypi në Bruksel, presidenti i Komisionit Evropian tha: “Kjo ishte një rrugë e gjatë dhe me zigzage, por ne kemi një marrëveshje të mirë për të treguar. Është një marrëveshje e ekuilibruar dhe është gjëja e duhur dhe e përgjegjshme për të bërë për të dyja palët.”

Ajo shtoi se tani ishte “koha për të kthyer faqen dhe për të parë të ardhmen” dhe se Mbretëria e Bashkuar “mbetet një partner i besuar”.

Do të ketë një periudhë tranzicioni pesë vjet e gjysmë për industrinë e peshkimit, tregoi ajo.

Bashkëpunimi do të vazhdojë për çështje që përfshijnë ndryshimin e klimës, energjinë, sigurinë dhe transportin.