FBI spiunoi fushatën e Trump? Publikimi i dokumentit sekret trazon ujërat në SHBA

Një memorandum i hartuar nga Republikanët që pretendon njëanshmërinë e FBI-së kundër Presidentit Donald Trump do të publikohet të premten, sipas një zyrtari të Shtëpisë së Bardhë.

Sipas mediave amerikane, Trump pritet të deklasifikojë dokumentin dhe ta dërgojë në Kongres për publikim. Byroja Federale e Hetimit ka shprehur shqetësim për publikimin e dokumentit, i cili mund të ketë redaktime.

Sipas dokumentit, FBI gënjeu një gjykatë të inteligjencës për të marrë një urdhër për të spiunuar fushatën zgjedhore të Trump.

Demokratët thonë se memorandumi është një mënyrë për të diskredituar një hetim federal mbi lidhjet mes fushatës presidenciale të Presidentit Trump dhe Rusisë.

Dokumenti me katër faqe u hartua nga këshilltarët e Kreut të Komitetit të Inteligjencës së Senatit, Devin Nunes, i cili ishte në ekipin e Trump-it gjatë tranzicionit për në Shtëpinë e Bardhë.

Memorandumi raportohet se akuzon FBI-në dhe Departamentin e Drejtësisë se kanë gënjyer një gjykatës në mars të vitit të kaluar ndërsa kërkuan që të shtynin një mandat survejimi kundër Carter Page, një këshilltar i politikës së jashtme gjatë fushatës së zgjedhjeve të republikanit Trump.

Carter Page, ish këshilltari i Trump, dëshmoi para një komiteti të kongresit në nëntor të vitit të kaluar se kishte takuar zyrtarë të qeverisë ruse gjatë një udhëtimi në Moskë në korrik të 2016.

Sakaq Demokratët thonë se Shtëpia e Bardhë mund ta përdorë memorandumin për të justifikuar shkarkimin e prokurorit special Robert Mueller, i cili drejton hetimin për ndërhyrjen e supozuar të Rusisë në zgjedhjet presidenciale të 2016 dhe bashkëpunimin e mundshëm mes ekipit të fushatës Trump dhe zyrtarëve të Kremlinit.

Deklasifikimi i memorandumit nga ana e presidentit Trump është kundërshtuar edhe nga Departamenti amerikan i Drejtësisë, i cili ka palajmëruar se publikimi i tij mund të rrezikojë inteligjencën bazë që përdoret për ta hartuar atë. (Përktheu BalkanWeb/Artikulli origjinal në BBC)