Franca në alarm për sulmet antisemitike; Grafiti me 60 yje të Davidit…kujtojnë vitet 1930-të

Rreth 60 yjet e Davidit janë pikturuar nëpër  mure në lagjen e 14-të të Parisit. Yjet e Davidit janë gjetur në formë grafiti dhe mendohet se “kujtojnë vitet 1930”.

Franca po përballet me një rritje të madhe të incidenteve antisemitike.

Më shumë se 850 akte të tilla janë raportuar në Francë që nga sulmet e Hamasit në Izrael më 7 tetor, thotë ministri i Brendshëm Gérald Darmanin.

Autoritetet e Parisit njoftuan se do të nisë një hetim për degradimin e pronës me qëllim racist.

“Po qaj, sepse po shoh edhe një herë urrejtjen që kemi marrë kur isha fëmijë”, tha një banor i njërës prej ndërtesave të grafituara për transmetuesin BFMTV. “Unë nuk mund ta kuptoj atë.”

Në një deklaratë, kryebashkiaku i qarkut 14 shkroi se aktet “kujtojnë ngjarjet e viteve 1930… që çuan në shfarosjen e miliona hebrenjve”.

Emmanuel Grégoire, zëvendës i kryebashkiakut të Parisit, Anne Hidalgo, tha se yjet do të hiqen dhe do të nisë një hetim.

“Antisemitizmi vazhdon të vrasë,” tha zoti Grégoire. “Ne kurrë nuk do të heqim dorë nga lufta.”

Më vete, një grua u plagos rëndë pasi u qëllua nga policia mëngjesin e së martës. Oficerët pretenduan se ajo po sillej në një mënyrë kërcënuese dhe refuzoi të zbatonte udhëzimet.

Grafite të ngjashme u gjetën gjithashtu në periferi të Parisit, duke përfshirë Vanves, Fontenay-aux-Roses, Aubervilliers dhe Saint-Ouen. Yjet ndonjëherë shoqëroheshin me mbishkrime të tilla si “nga lumi në det, Palestina do të fitojë”, sipas raporteve.

Kryetari i bashkisë së Saint-Ouen, Karim Bouamrane, bëri thirrje që autorët e grafiteve “antisemitike dhe raciste” në qytetin e tij të ndiqen penalisht në masën e plotë të ligjit.

Prokurorët kanë paralajmëruar, megjithatë, se është ende e paqartë nëse yjet kanë natyrë antisemitike.

Të martën, kryeministrja Elisabeth Borne dënoi ato që ajo i quajti “akte të turpshme”.

Rritja e mprehtë e incidenteve antisemitike shqetëson 83% të francezëve, zbuloi një sondazh për BFMTV.

Udhëheqësit politikë, përfshirë presidentin Emmanuel Macron, kanë paralajmëruar rrezikun e “importimit” të tensioneve të shkaktuara nga lufta Izrael-Hamas në Francë.

Rreth 400 njerëz janë arrestuar për akte antisemitike këtë muaj, tha të dielën Ministri i Drejtësisë Eric Dupond-Moretti.