George Floyd vdiq nga mungesa e oksigjenit

Ndaj 46-vjeçarit u ushtrua forcë vdekjeprurëse në organet e frymëmarrjes

“I mbajtën gjurin mbi trup për 3 minuta e 27 sekonda pas frymës së fundit”

Ekspertët i thanë gjykatës të enjten se afroamerikanit George Floid vitin e kaluar nuk vdiq pse kishte konsumuar drogë apo medikamente, por prej forcës vdekjeprurëse të policëve që po tentonin ta arrestonin.

Shkaktari kryesor i dyshuar për vdekjen është polici Derek Chauvin bashkë me tre kolegët e tij.

Vdekja e afroamerikanit, George Floyd tashmë një simbol i luftës kundër racizmit dhe dhunës policore, vlerësohet se erdhi si pasojë e mungesës së oksigjenit gjatë arrestimit, mbrëmjen e 25 majit 2020.

Të enjten vijoi gjyqi ndaj ish-policit Derek Chauvin dhe oficerëve të akuzuar për ngjarjen që tronditi Amerikën.

Ekspertët e policisë dhe mjekësisë dëshmuan për forcën vdekjeprurëse që u ushtrua ndaj Floyd-it, siç ishte shtypja me gju e organeve të frymëmarrjes nga ana e policëve të pandehur.

Doktori pneumolog, Martin Tobin, e përjashtoi si mundësi pretendimin e palës mbrojtëse se frymëmarrja ishte ngadalësuar nga qetësuesit që viktima kishte konsumuar më parë.

“Faktorët kryesorë që penguan frymëmarrjen ishin shtrirja e z. Floyd në tokë, prangosja në vend, pesha me gju mbi qafë, pastaj mbi shpinë dhe anash. Pasi mori frymën e fundit, gjunjtë peshuan mbi të edhe për 3 minuta e 27 sekonda. Edhe kur policët e panë që nuk kishte më puls, gjuri i qëndroi sipër edhe 2 minuta e 44 sekonda të tjera.“- Dr Martin Tobin

Shefi i policisë së Mineapolisit ku ndodhi ngjarja dëshmoi këtë javë se oficerët nuk ishin trajnuar për të vepruar në atë mënyrë me të dyshuarit.

I pandehuri Chauvin, që rrezikon deri 40 vite burg për vrasje, akuzohet se ushtroi presion mbi trupin e 46-vjeçarit për 9 minuta me radhë.

Floyd u ndalua pas denoncimit se kishte përdorur para false për të blerë një paketë cigaresh, por refuzoi t’i bindet urdhrit për shoqërimin në polici.