Gjykata Supreme në Venezuelë sulmohet me granata

Gjykata Supreme e Venezuelës është sulmuar me granata të hedhura nga një helikopter i rrëmbyer, gjë që ka thelluar edhe më tej krizën në këtë vend.

Nga të dhënat paraprake mësohet se mjeti fluturues është rrëmbyer nga një oficer policie, i quajtur Oscar Perez, i cili përmes një lajmërimi të bërë deklaroi se do të sulmonte qeverinë që e cilësoi të kriminalizuar. Përmes video-mesazheve që kishte publikuar më herët ai duket se ka edhe mbështetës të tjerë, ndërsa thekson se nuk i përket asnjë partie politike.

Zyrtarët bënë të ditur se i dyshuari përveçse hodhi granata në godinën e sallës më të lartë të gjyqsorit të Venezuelës, kishte qëlluar edhe me armë zjarri. Fatmirësisht nuk ka patur të lënduar, por nuk dihet ende vendndodhja e agresorit.

Autoritetet kanë nisur menjëherë verifikimet për të arrestuar Oscar Perez, ndërsa nuk bëhen të ditura shumë detaje në këtë drejtim. Përveç sulmit mbi Gjykatën Supreme, oficeri sulmoi edhe mbi Ministrinë e Brendshme dhe atë të Drejtësisë, por dëmet mbi këto institucione kanë qenë të pakta.

I menjëhershëm ka qënë reagimi i Presidentit të vendit, Nikolas Maduro. Lideri i Venezuelës e dënoi ngjarjen duke e përshkruar si një sulm terrorist. Në mbyllje, ai theksoi se autoritetet kanë nisur menjëherë punën për të vënë përpara përgjegjësisë agresorin.

Sipas Maduros, ishte një fat i madh që e gjithë kjo histori përfundoi pa viktima.